Friday, May 4, 2007

ولا أم كلثوم ولا الإخوان ولا الشباب الإصلاحي ولا مدونات البنات ولا اي حاجة خالص

الراجل ده مش واخد على الحبسة هيتجنن ويمسك واحد منهم هيقطعة

والراجل ده ما عملش لحد حاجة ذنبة إيه يا عني ولا عشان ارنب


الإتنين في القفص الأرنب والأسد

انا مش هكون الأرنب طب لو اسد ما هو بردة في القفص

عاوز اكتب حاجات كتيير عاوز اكتب عن الجانب العاطفي في حياة الجيل بتاعنا
عاوز ابعد عن الجفاف اللي في المواضيع اللي عمالين نناقشها
كنت عاوز اكتب عن أم كلثوم وعن فضل شاكر
عاوز اكتب عن أغنية إنت عمري
عاوز اتكلم عن عمر خيرت عن الأيام وعن زي الهوى
عن الفن الجميل و الجوانب اللي بيلمسها فيينا من جوة
وجهزت اللينك بتاع حكم الغناء من إسلام اون لاين
عشان ما اتجادلش مع حد ويقولي بتسمع اغاني لية ده لغو ومهي عنه وكل الخلافات اللي عارفينها !!!!!1
لكن
لقتني بقول لنفسي مش ده اللي انا عاوز اكتبة
قولت طيب هكمل النقد الذاتي اللي بدأت فيه من اول المدونة ما فتحت
وهتكلم بحيادية وتحليل وبتركيز
خاصة وإن مجدي دخل في الموضوع بتقلة

وكمان الراجل المجدع الهندسة عبد الرحمن رشوان وهو بيتكلم بكل حكمة وعقل

أو محمود سعيد الراجل المجامل صاحب الخلق الحسن
لكن قولت
لأ مش ده اللي انا عاوزة
طيب هكتب عن الكلام اللي بيتردد عن الشباب الإصلاحي داخل الإخوان
هم عاوزين إيه ؟؟؟
وبيفكروا إزاي ؟؟
ومين جمعهم على افكار مشتركة ؟؟
وفي حد بيحركهم ولا لأ ؟؟
وقلت
لأ
مش ده اللي انا عاوزة
قلت خلاص
يبقى انا هكتب عن الإخوان من الناحية الإيجابية
يعني من ناحية الجوانب المضيئة
وإيه الإنجازات اللي حققوها ؟؟
ولو ما فيش إخوان في مصركان هيكون شكلها إيه ؟؟؟
حتى دي نفسي مسدودة عنها
طب انا إنقطعت شوية ورجعت لقيت ظاهرة كويسة اوي وهي دخول البنات وبجرأة لعالم المدونات سواء كانوا من الإخوان أو غير الإخوان
وكنت هكتب عن الأراء الممتازة اللي بيطرحوها
وعن العقول الكبيرة اللي بنظلمها
ونقعدها في البيت أو في مقارئ مغلقة
كنت هكتب عن اروى الطويل
وعن منة صابر وهي ضد الإسدال

ولا خديجة وهي بتتكلم عن إخوة اون لاين
لقيت إني مش عاوز اكتب في ولا حاجة من دي
لا لا لا كل ده مش حاسس إنه بيعبر عن اللي انا عاوزة
إحنا شباب مش عشان نكتب وبس
عشان نتحرك نمشي نعمل نجري
الكتابة مهمة
لكن مش كل حاجة
الله ياخد النظام بتاعنا ده قافل كل حاجة في وشنا !!!!!!!!!!1
قافل الأحزاب وقافل الإعلام وقافل الجمعيات والنقابات وغيرة وغيرة
وفاتح بطنة
الله يقطع النظام ويقطع الإنقلابات العسكرية اللي بتجيب النظام ويقطع رجالة النظام وعيال النظام وحرمية النظام وشيوخ النظام ومخبرين النظام
الله يقطعكم كلكم يا بعدة
عاوزين نتحرك بندرس سياسة وبعدين ؟؟؟
تطوير بنفكر فيه طب وبعدين ؟؟
بنحسن أخلاقنا وبعدين ؟؟
نقد ذاتي ومعنوي وداخلي طب وبعدين ؟؟
إنت علقت على بعدين
بجد كله ده بيروح فيين ؟؟
الثواب عند الله
الإخوان بنشتغل معاهم
بس هنعمل إيه في القفلة السودة اللي ساددها النظام
كل خمسين إخواني بيشتغلوا في حتة متر في متر في حتة ضيقة قوي الدولة ضيقة عليهم واسعة لغيرهم
المؤتمرات بنحضرها كلها والمظاهرت ما نسبهاش والحوارات بندخل فيها في كلية سياسة وإقتصاد ماشي في الجامعة الأمريكية ماشي على النت ماشي في الجوامع ماشي
لكن كله كلام ومبادئ عاوزين نكون فاعلين نقوم بفعل
واللي هيقول الكلام فعل يبقى بيخلط
لازم نتكلم الأول ماشي لكن إحنا عاوزين نبدأ عمالين بنكلم بعض والنظام مش عاوز يسمعلنا وسايبنا نكلم بعض بس في السر كمان
حد فينا عضو مجلس محلي مثلا
ولا عضو في مجلس نقابة إن شالله نقابة ابو حمص ؟؟
ولا بيروح يوم اجازتة امانة الحزب اللي هو منه ؟؟
ولا رايح يشارك في إضراب عام قدام بيت الريس ؟
طب نروح فين
عاوزين ننطلق نجري نبدع وإبداعنا يلاقي النور
نروح فين ؟؟؟؟
يا سيادة الريس قلنا نروح فين ؟؟
جاوبني بصفتك اب لكل المصريين
واللي ينكر إنك اب لكل المصريين في سيادتك دكاترة بيعالجوا الحالات اللي زي دي !!!!!!!!!1
طب هو الريس مشغول في الفرح مش هيرد

طب قولوا إنتوا نروح فين ؟؟؟؟؟؟؟؟؟؟
انا عن نفسي رايح عمرة إن شاء الله الأسبوع ده بس 10 ايام وراجع

24 comments:

Anonymous said...

الكلام

و كتر الكلام

مممممم

كنا بناخد كورس نيجوشييشن سكلز

الدكتور قالنا يا جماعة اول حاجة نعملها دايما لما نبتدي شغل

اننا نوحد المفاهيم

يعني ايه

يعني في ناس بتتخانق احيانا على حاجة هما متفقين عليها

بس كل واحد مسميها اسم

فباينين كانهم مختلفين

عشان كده لازم نبدا بالكلام

لازم نوحد الرؤية

احنا عايزين نروح فين .. ماشي احنا مش عايزين نستمر في الوضع الحالي

بس عايزين نوصل لايه

لازم ده يكون واااضح جدا في اذهانا

و كلنا شايفينو بنفس الاسلوب و نفس الطريقة

الناس اللي قدرو يحددو ده .. هما اللي بيعرفو يشتغلو صح

اصل انا مش معاك انو الكل بيتكلم

لا في ناس بتشتغل و بتعمل و بتحاول

بس فين الرؤية و الحلم المشترك

اللي يوحد مجهودنا كلنا

عشان لما نشتغل .. نشتغل في خط واحد

عشان منحسش ان مفيش فايدة

من كتر المحاولات اللي مش بتجيب نتيجة

،

اخر حاجة بقى

كان ايه لازمة الخناقة بس

:D

عبدالرحمن رشوان said...

كلامك خطير ياصاحبى
نزعة إنفصالية دى ولا ايه :))
خلى بالك
ممكن تتفهم كدا

وبصراحة اختيارك للصور ورمزيتها جميلة

وأعتقد إن فهمنا للحركة داخل المجتمع لازم تتغير
الحركة داخل المجتمع مش يعنى نكلم الناس فى الاتوبيس

فى نظرى

يعنى ندخل فى المجتمع ومؤسساته وبجد

يعنى نخش فى الأحزاب
والحركات زى كفاية
والجمعيات
والنقابات
وحتى ياسيدى الحزب الوطنى

وبكدا نغيير المجتمع بجد


وأنا سعيد جدا إنى شوفتك إنهاردة
وتروح وترجع بالسلامة
عبدالرحمن

FATMA said...

دي توهه
و لا ملل
و لا خوف
و لا ايه



يا ريت تلغي الفيرفيكاشن ورد عشان انا نظري ضعيف و بعيد فيها خمسينالف مرة

محمد said...

البداية جميلة وعبرة جدا

لكن بعد كده حسيت بتشتت في أفكارك , ركز واكتب في أي حاجة

المهم اكتب

Word Verification عشاااااان خاطري إلغيه

Unknown said...

وادينا عايشين

محمود سعيد said...

يا سلام على الكلام

بتقلب علينا المواجع ليه
يعنى أنا كل ما نشوف حد من الجيل اللى فات
جيل السبعينات
نلاقى كل واحد منهم عمل وعمل وكان وكان
ودلوقتى يمكن مبيعملش

طيب إحنا بقى نعمل إيه واحنا لا عملنا فى شبابنا
ويا عالم هنعمل قدام ولا لأ

والله بقالى مدة عندى كذا فكرة عاوز أكتب عنها

بس مليش نفس خالص
حتى الموضوع بتاع الذكريات ده بالعافية كنت باكتبه
والموضوع بتاع التقرير الأمنى كتبته وانا سخن ولو كنت هديت كنت كبرت دماغى

بس زهقت من الكتابة ومش عاوز أكتب
هو صحيح الكتابة عمل
بس مش هى كل العمل

زى ما التغيير مش كله مظاهرات زى ما فى ناس فاكرة

الواحد يعمل إيه مش عارف

على جنب
أنا مبحبش لما حد يمدحنى وباتضايق
إن صح إعتبار كلام حضرتك فى حقى مديح
بس جزاك الله خيراً
أهو كلام يبسط فى الغم اللى احنا فيه ده

عصفور المدينة said...

نقلت لنا الصورة النفسية بشكل تلقائي جدا
وبعدين أنا كنت فاكر إن التدوينة حتنتهي عند الصورتين وصلت الفكرة يافندم

Anonymous said...

ليه الازمة اللي انت عاملها في نفسك دة الحياة ابسط من كدة كتير تكمن بساطتها في انك ماتفكرش كتير في الازمة ودور علي الاشياء اللي تبعث التفاؤل فيالحياة واما بالنسبة لكل الحاجات اللي انتي بتتكلم عنها هتتحل ان ماكانش علي ايد الجيل بتاعنا اواحفدنا اواي حد فهيه هتتحل باذن الله وخلينا نعمل بقول الرسول صلي الله عليه وسلم تفاؤلوا بالخير تجدوه وفي رايي انهاكل ما هتضيق حتما ستفرج الي يخلينا نضيق ونقلق انالحياة تمشي سهله وميسره عامة ربنا يكرمك ويكرمناالحيلة حلوة واحلي مافيها قلب يحبك خاف عليك يدعي ليك سواء اخوك اختك ممامتك اواي حدالمهم تدور انت عليه عشان تحس بحلوة الحياة والمهم يارب تكون فهمتني ابقي ادعيلي معاك ي

اروي الطويل said...

جزاكم الله خيرا
برفعوا معنوياتي الله لاعتقد انياستحق هذا
عامة بما انك هتروح عمرة
امانة عليك بالله عليك ماتنسي
تدعيلي ربنايوفقني ويهديني

Anonymous said...

مش عارف ليه
انا فهمت إن الأسد ده واحد من قيادات الإخوان اللي جوة
وهو فعلا بيبص زية
لكن ما فهمتش هو الأستاذ حمزة يقصد مين بالأرنب؟؟؟
وبعدين الأسد ده عاوز يقطع مين ناس من الحكومة يعني ولا ناس كده مضايقينة
الأخ حمزة بيلون بردة في الصورة دي

بس بجد حلوة الدخلة دي
وبعدها على طول إنت عمري الله
وفضل شاكر ياعم ده رومانسية على اصولها
تدوينة حلوة يا استاذ محمد حمزة يالي من الإخوان
ومش هكتب إسمي عشان الأسد اللي فوق ده ما يهبشنيش لو جري ولا حاجة
ههههههههه

Anonymous said...

يا عم اتقوا الله بقي في الاخوان والله......التعويم ده هيضيع مننا ناس كتير..........الله اعلم اذا كنت من الاخوان حضرتك واللا لا بس ايه اللي ف البروفايل ده....اصاله وام كلثوم يا عم بقي ارحمونا بالله عليكم.....مش محتاج اقرا دليل ولا فتوي بلاش وجع دماغ

ويا تري بقي ام كلثوم عاطفي واللا وطني
ويا سلام علي انت عمري اللي سيادتك كنت عايز تكتب عنها مش دي لقاء السحاب بين الزعيم والموسيقار والكوكب
بالله عليك لو كنت فعلا من الاخوان اتق الله وبلاش التعويم ده ......وعلشان كدة كلامك ملخبط ومنتش لاقي حاجة تعملها ولا هتلاقي

محمود سعيد said...

ليه شيلتها وقولت بلاش علشان الناس بتفهمها غلط :-)

طيب سيبت الأفلام ليه بقى :-)

Anonymous said...

كنت عايز أقولك ماتبآش طموح زياده عن اللزم وواثق أوي إنك طالع العمره

أولاً قول إنشاء الله
ثانياً حد عارف يمكن ربنا كاتبلك سفر تاني غير السعوديه
ثالثا يمكن في المطار يعرفوا إنك صاحب منعم أو عالأقل مدون فيجيبوك من الطياره

بس ولا يهمك أصحابك المدونين كلهم هايكتبوا عنك أحلى كلام

روح انتا بس وربنا هايوفقك

واحد من الإخوان said...

الأستاذة منة
انا معاكي
فعلا لازم نتكلم ونتفق على مصطلحات مشتركة نفهم بيها بعض ويمكن كنت إتكلمت في التدوينة السابقة في كده

لكن
اللي انا بتكلم فيه هو إن المسارات لتحويل الكلام ده لفعل حقيقي هنا في مصر كلها مغلقة
والشباب مش لاقي مسار ينطلق فية ويمكن ضربت مثال النقابات وغيرها عشان كده
وشكرا على التعليق
وانا حذفت الخناقة مع إني شايف إنها كانت كويسة مش وحشة
ورأيي في طريقة كتابتك قلته قبل كده وهكرر إنه فعلا مميز
---------------------------------
المهندس عبد الرحمن
مش خطيير ولا حاجة الكلام
موضوع الأحزاب والنقابات وغيرة
هو اصلا الدولة قافلاه ومش سامحة لحد يتحرك فيه
يعني إحنا كمهندسين تقدر تقولي هتمارس عمل نقابي فين ؟؟
وما بتكلمش عن عمل نقابي سياسي لأ عمل نقابي خدمي ؟؟
الدنيا كلها مقفولة

واخيرا انا كنت اسعد لما قابلتك وزي ما قلتلك انا لما شوفتك ما حسيتش بفرق عن اللي كنت راسمة في دماغي
وعقبالك إن شاء الله
------------------------------
الأستاذة فاطمة محمود " توتة توتة "1

هي مش توهة
هي بحث عن مسار يحقق اللي الواحد بيفكر فيه عشان كل اللي بنعمله دلوقت لازم ينتقل لمرحلة تانية اكثر فاعلية

و لغيت الفيرفيكاشن
وشكرا جزيلا على التعليق

واحد من الإخوان said...

الأستاذ وضاح

هي البداية ليها علاقة بالموضوع

هو بس مش المقصود بالموضوع التشتت
لأ
هو بس الموضوع بينقلك ترتيب الوصول للنتيجة النهائية وهي إن سبب الضيق هو الجو العام المغلق
و أظن الواحد لما يحدد سبب المشكلة فهذا لا يعني التشتت
و منور المدونة
اه
انا غيرت ال word verification

------------------------

حازم باشا حبيبي

يا سلام صحيح خير الكلام ما قل ودل
عايشين !!!!!1
عايشين وبنقاوح لكن مش عاوزين نعيش مع اللي عايشين وساكتين
ومتشكر على عزومتك على الغدا
وكفاية علي التمر هندي
ههههههه
---------------------------------
الأخ محمود سعيد
انا سعيد إن الكلام وافق نفس اللي كنت بتفكر فيه
وجيل السبعينات لقى الفرصة اللي إداهالوا السادات الله يرحمة
صحيح كانت نص فرصة
لكن احسن مية مرة من اللي إحنا فيه
ربنا يفتحها من عنده
بس اتمنى الموضوع ده ما يخليناش نقعد عن الكتابة لازم نكتب
بس ندور على حاجة جنب الكتابة

وبردة على جنب
المديح ده من حقك علي ولازم اءديه
إنت فعلا أخ محترم سواء في خلافك او إتفاقك مع الرأي الأخر
ومجامل لأنك حريص على مشاركة الأخرين
فجزاكم الله خيرا

واحد من الإخوان said...

عصفور المدينة
الحمد لله إني قدرت اوصل الفكرة بوضوح
و في نفس الوقت بشكل تلقائي
وتعليقك ده أسعدني جدا لأني عرفت إنك وصلك كل اللي كنت عاوز اقولة
خاصة لما قولت إنك كنت فاكر الكلام هيقف عند الصورة
و منور المدونة
----------------------------------
المجهول رقم واحد ( فيه 3 مجاهيل في التعليقات )
ما فيش أزمة ولا حاجة
والحياة فعلا حلوة
وانا سعيد يعلاقاتي فيها
وبخرج وبتفسح وما فيش اي مشكلة خالص
اللي انا بدور علية هو زي ما قلت لمنة هو مسار حقيقي للحركة الفاعلة
في دولة كل المسارات فيها مغلقة
وكويس موضوع " مامتك " بيرجعني 17 سنة ورا
وشكرا على التعليق
---------------------------------
اروى الطويل
معقول نرفع من معنوياتك
ده المدونة بتاعتك ترفع معنوياتنا إحنا
عشان بنشوف فيها جيل ومجموعة من البنات المقبلات على العمل العام بفكر واعي وبطريقة سهلة
اما الدعاء
فدا امانه ولازم هأديها إن شاء الله
لكن إدعولي إنتوا
مش شرط الواحد عشان هناك هيكون دعاؤة أحسن
إن شاء الله دعاؤكم هنا هيكون فيه الإستجابة
وعقبالك إن شاء الله

وشكرا على زيارتك
و على مدونتك فيها السهل الممتنع الخفيف
---------------------------------
المجهول رقم 2

هو الأسد كل واحد يفهمه زي ما هو عاوز وهي دي حلاوة الرمز إنه بينفع للكل
وهو فعلا شبه واحد معين وده مدح مش ذم
أما الأرنب
فإذا كنا ما قلناش مين الأسد هنقول مين الأرنب ؟؟
من ناحية التلوين هو في تلوين بس على خفيف كده
والومانسية دي حاجة في وسط يوم مليان بالحاجات الجافة
وما تخافش من الأسد هو بس يإما تصاحبة وتحترمة اوي
أو إبعد عنه خاص وإستخبى منه
ههههه

Aml Ghonaim said...

ربما فى كثير من الأحيان يصيبنا ذلك الشعور بالتشرد ! هل هذه هى الكلمة الحقة ؟ لا أدرى ولكن حينما أكون بتلك الحالة أصف نفسى بالتشرد .
نعم ؛ مايحدث لنا يبعث فى أنفسنا تساؤلا عميقا .
ماالجدوى من ذلك ؟ ماجدوى العلم ان لم يكن بامكاننا تعليمه ؟ ما جدوى التجربة ان لم نستفد منها ؟ ماجدوى الألم ان لم يدفعنا ؟
ماجدوى أن نعرف الحق ثم لانناضل من أجله ؟!!!!
لا أدرى ماالذى يمكننى أن أقوله لأنى أحيانا أحس بنفسى كثيرا هكذا ؛
وغالبا يكون الحل الذى أعطيه لنفسى : لاتدعى الاسلام السياسى يشغلك عن الاسلام الروحانى ؛
التزود بطاقة روحانية يفيدنا كثيرااا فى الصبر على هذه الأيام !
أمــــــانة ان يسر الله لك الذهاب الى مكة ؛ لاتنسانا من الدعاء
ولا تنسى المسلمين من صالح دعائك ...
تحيااااااتى الخااالصة لك ..

shab masry said...

اخي الكريم اختلف معك تماماً...

معلش انا اسف ممكن حضرتك تجبلي من الفتوى كده انك ممكن تسمع ام كلثوم او فضل شاكر؟؟

بالمناسبة.. بعيداً عن كلام الشيخ القرضاوي حفظه الله... اغلب ائمة السلف والائمة الاربعة حرمةا الغناء.. فهل نترك كل هؤلاء ونتبع فتوى القرضاوي حفظه الله مع كل الاحترام له.. فحذائه على راسى...

دي حاجة.. الحاجة التانية باة... لو في جهاد.. هل تعتقد ان الي بيسمع ام كلثوم وعمر خيرت هيكون من المجاهدين؟؟؟

يقول الله عزوجل "ولو ارادوا الخروج لاعدوا له عدة ولكن كره الله انبعاثهم فثبطهم"

نسال الله عزوجل ان لا نكون من الذين كره الله انبعاثنا.. ولكن ما العدة التى اعددناها.. ام كلثوم وعمر خيرت وفضل شاكر.. ونعم الاعداد...

كان لي مقال عن موضوع الانفتاح.. اتمنى منكم قرائته

http://shabmasrey.blogspot.com/2007/04/blog-post_21.html

mohamed said...

اسلوب ذكي في الطرح :)

اسلام رفاعى said...

بعد اذن حضرتك أنا عملت رابط لمدونتك عندى فى (أطالعهم)فى المدونة

me said...

معرفش والله
!!!
بس عموماً الفضفضة مهمة
!!!
خصوصاً لما تكون فضفضة من كله
!!!
الواحد بيحس بعدها إن ذهنه صافي ونفسه يكتب
!!!
بس برضو أنا رأيي من رأي الأخ شاب مصري
!!!
إزاي يبقى اسمك أخ
!!!
وبتغني لفضل وأم كلثوم ومش عارف مين
!!!
فرقنا إيه بقى عن الناس العادية
!!!
مش عارفة
!!!
بجد أنا كان مش عارفة أكتب تعليق
!!!
مستغربة جداً
!!!

mohamed said...

يا اخت خديجة فكري في الكلام اللي كتبة مره تانية وبصي علي اللي بيحصل حوليكي هتقهمي هو بيكلم علي ايه

والاستغراب هيروح

واحد من الإخوان said...

إلى كل الأعزاء الذين علقوا بعد يوم السبت
وكذلك من هم بعد يوم السبت

أعتذر سأرد على التعليقات

في خلال يومين

بعد العمرة

وفي مدونة خاصة

لأهمية تعليقاتكم

Unknown said...

شركة مكافحة حشرات بالخبر
شركة مكافحة حشرات بالدمام