Saturday, April 28, 2007

الإنشقاق الكاذب ( كدة وكدة )1


ده شق في الأرض بس مش عارفين هو سطحي ولا عميق لتحت




بنحس كلنا بالذنب وبنقلق لما نتناقش في موضوع الإنشقاق عن جماعة الإخوان المسلمين

انا في الحقيقة زيكم ولكن خلونا نتجرأ ونتكلم وناقش اللي بنخاف منه عشان نعرف الأمور رايحة فين وجاية منيين

في الحقيقة هنتكلم على اساس كذا حاجة

1- المنشقين

2- هل الإنشقاق فعال مع الجو السياسي في مصر ؟؟ الإنشقاق الكاذب
3- المجمدين
4- سلوكيات ما بعد الإنشقاق والتجميد ( من الطرفين الجماعة ومن المنشقين عنها ) 1
5- جبل الثلج
6- النموذج التركي
وبعدين نجاوب على سؤالين
7- هل الإحتواء اولى والبحث عن التجديد الداخلي أم الإنشقاق والتجديد في كيان جديد أفضل ؟؟
8- والحفاظ على كيان الجماعة هل هو حقيقي ؟؟؟؟؟؟


بس قبل كده احب إني اقول إني مش مجمد ولا منشق والأمور إلى حد ما ماشية كويس معايا
وإني من الناس اللي مقتنعة إن اللي مش قابل أفكاري براحتة ممكن ينشق هو عن الجماعة

1-المنشقين

من زمان والجماعة فيها خلافات داخلية بين القيادات من ايام النظام الخاص ولحد النهاردة
والخلافات دي حاجة طبيعية
لكن اللي مش طبيعي هو إننا بنلاقي الخلاف ده بيتطور لعناد قيادي بيأدي لوجود إزدواجية في القرارات
زي موضوع حزب الوسط مثلا
الأخطر من كده
إن الجانبين ليهم ارضية إتفاق كبييرة
لكن إختلفوا في الأليات
هل الموضوع هو خلاف في الأليات ولا هو حاجة أعمق ؟؟
يعني هل مثلا بتوع حزب الوسط كان موضوع حزب الوسط هو القشة التي ما اعرفش إيه في البعيير
ولا الموضوع ليه جزور تانية ؟؟؟
لأن حتى البرنامج اللي بيتبنوه هو برنامج الإخوان مع حذف مجموعة مصطلحات
وفي نفس الوقت اللي كان بيتبناة مجموعة الوسط من عشر سنين تبنتة الجماعة الأن !!!!!!!!!!!!1
يعني لا هم قدموا حاجة جديدة ولا الجماعة قدمت بعد عشر سنين حاجة مختلفة !!!!!!1
بمعنى اخر الموضوع مش خلاف على موضوع الحزب واضح إنه اعمق وهو ده اللي بتكلم فيه


2- الجو السياسي والإنشقاق

طبعا اي حد عاوز ينشق عن الإخوان بيسأل نفسة سؤال مهم
انا هعمل إيييه ؟؟
لإن اللي إشتغل مع الإخوان لفترة ما بيقدرش يسبهم ويقعد في البيت ويبقى مواطن صالح على رأي مجدي سعد
لكن بيصدم بالنظام السياسي بتاعنا لإنه قافل الحياة السياسية كلها
يعني لما تنشق عن الإخوان
إعمل جماعة تانية
أو إعمل حزب بس بشرط يكون بيحبة صفوت بية وزكريا بية ومؤخرا جمال بية
يعني من الأخر اللي بينشق مش هيعرف يعمل حاجة
وده اللي اوجد ظاهرة " المجمدين "1

3- المجمدين


في ناس كانوا ليهم وضع كبيير قوي سواءكانوا نقابيين مبدعبن أو إعلاميين ولا غيرهم
يعني إيه يكونوا مجمدين ؟؟
معقول ممكن يصل الخلاف لدرجة إن الواحد يجمد نفسة او إن الجماعة تجمدة ؟؟
إيه اللي بيحصل وبسبب إيه ؟؟
هل العامل التربوي زي ما الجماعة اليمينيين في الجماعة ما بيقولوا ؟؟
ولا ما فيش إحتواء للأخر إلا عند حدود معينة ؟
وبعدين لما هو إتجمد طب كده هو بيعمل إيه في الجماعة
بيحضر الأسرة ويعمل الورد بقى وكده !!!!!!!!1
إيه الكلام ده ؟؟
ولا هم المجمدين دول عارفين إنهم مش هينفع يسيبوا الجماعة فقاعدين لحد ما ربنا يفرجها ؟؟
معلش خلينا نتكلم بصراحة اكتر
في عندنا مثلا شخصيات وبدون ذكر اسماء وهم من الناس يتكلموا إعلاميا بشكل ممتاز
هل حجمهم الإعلامي بيعكس حجمهم التنظيمي ؟؟؟؟؟؟
أنا في رأيي لأ طبعا
طب سؤال تاني هل الشخصيات دي2007 هي نفسها 1987
ردوا إنتوا بقى !!!!!1
هم طبعا مش مجمدين وهم من القيادات الكبيرة لكن بنتكلم عن وضع معين ليهم
طب هو إنتوا مش تتفقوا معايا إن المجمدين دول ممكن نقول عليهم هم كمان ( منشقين ) بس جو الجماعة ومش بإرادتهم
النموذجين دول ( المنشقين والمجمدين ) بيأكدوا إن الإنشقاق ده غير حقيقي لأنه لم يؤد إلى شئ جديد
يعني إنشقاق كده وكده
وكاذب لا تعني الكذب لأ تعبيير عامل زي الحمل الكاذب كده
يلا نفتح باب النقاش مع بعض عشان نوصل لمفهوم يساعدنا
في باقي النقاط المرة اللي جاية واللي هية
سلوكيات ما بعد الإنشقاق وجبل الثلج والنموذج التركي والسؤاليين الأخرويين المهمين اللي في المقدمة

وبأكد تاني
الموضوع مش شخصي

واللي شايف إن إحنا بنقول كلام مش كويس هو حر في رأييه لكن بلاش يلبس ثوب إن هو الجماعة وإن الأخرين منشقين عنها
لأن بصراحة الثوب ده هو اللي بيأخرنا وبيزود المشاكل
عاوزين نواجه المشاكل مش نهرب منها إلى كلام المسكنات بتاع الناس اللي بتحب تجامل
الجماعة دي مش بتاعت حد
اللي ممكن يعمل نفسة هو الجماعة النهاردة ممكن نلاقيه سايبها بكرة

عاوزين نتكلم بصراحة بس بلاش حجارة مجدي سعد

وعذرا على الإطالة
و المرة الجاية نكمل الموضوع
وياريت لو نقرا حوار دكتور عبد المنعم في الدستور يوم الخميس اللي فات
المهم لحد المرة اللي جايا عاوزين نعرف
هو الإنشقاق صح ولا التجميد ولا الإتنيين ولا الإتنيين غلط ؟؟
ولا وهو اصلا ما فيش مشكلة خالص
والمجمدين والمنشقين دول لا يمثلوا نسبة تستحق النقاش ؟؟؟؟؟؟؟؟






Tuesday, April 24, 2007

الحزب تغيير مبادئ ولا إعلان مبادئ



هو وقتة ولا مش وقتة ؟؟؟؟
بصراحة الضغط الأمني والظلم الواقع على الإخوان وعلى الناس كلها بيخلي الواحد ملوش نفس يتكلم او يقرا
لكن في الحقيقة مع إقتراب إعلان برنامج حزب الإخوان " كان المفروض من فبراير اللي فات " لازم نقول اللي عندنا لإن الهجمات مش هتخلص و "وإذا كان اللي بنشوفة سيئ فاللي جاي أسوأ " وعلى رأي الأستاذ ضياء رشوان الشيطان الأكبر في القوانين وفي رأي الشيطان الأكبر لما يحصل اللي كلنا مستنينة والراجل الصغير يبقى مكان الكبير
المهم
هنتكلم بلغة بسيطة وتطبيقية بعيدا عن الفلسفة السياسية

إجابات عشوائية
دخلت في حوارات مع ناس كتير من الإخوان ومن غير الإخوان عن برنامج الحزب وسيناريوهات العمل لو كان في فرصة حقيقية لتكوين حزب للإخوان وبتفاجئ بكلام غريب قوى
مثلا بتكلم مع واحد " وهو مثقف جدا و سياسي " بتكلم معاه عن دور الجماعة لما يتشكل الحزب هل هتسيطر عليه ولا هو اللي يسيطر عليها ولا إيه الوضع
رد علي بكلام عشوائي بإن الجماعة لازم تراقب أداء الحزبيين عشان ما يخرجوش عن المبادئ !!!!!!!!!!!1
طب إزاي هتراقبهم يعني الواحد مثلا رايح يحضر كممثل عن حزب الإخوان في مؤتمر يروح يستأذن الجماعة ولا الحزب يعني مثلا يروح لنقيبة في الأسرة ولا مسئول المكتب الإداري في المحافظة ؟؟؟؟؟؟؟؟؟؟؟
ودخلت مع إخوة في حوارات عن نفس الموضوع اختصرها في الأسئلة اللي جاية
لو الراجل ممثل الحزب ده مش من الإخوان مش هنخلية يمثل الحزب ولا هندخلة الحزب كدة وكدة ؟؟؟؟؟؟؟؟
طب لو كان الراجل ده مسيحي هتعمل الجماعة إيه ؟؟؟؟؟
طب لو إترشح للرئاسة صفوت الشريف أو الدكتور رفيق حبيب الحزب هيأيد مين ؟؟؟؟؟
طب تأييد رفيق حبيب مش معناه إن الولاية العامة هتكون مع غير المسلم ؟؟؟؟
ولا ننتخب محمد صفوت الشريف ؟؟؟
ولا نقاطع ؟؟؟؟؟؟؟؟
طب في حاجة تانية اهم هنخلي مسئول المرأة في الحزب راجل ولا واحدة ؟؟؟؟؟؟؟؟
يعني هنخلي الأخوات في قسم المرأة وينتخبوا ممثلة حزبية ولا ننتخبلهم إحنا ممثل راجل ؟؟
طب نفترض في واحدة معجبة بمبادئ الحزب بس مش عاوزة تكون من الأخوات و بتلبس ضيق شوية
هنمنعها من العضوية ولا هنحط شروط لملابس عضوات الحزب ؟؟؟؟؟؟؟؟؟؟؟؟؟؟
طب نفترض العضوة دي رشحت نفسها في الإنتخابات الداخلية للحزب هيتفق الأخوات بينهم وبين بعض على واحدة تانية ولا هيمارسوا حياة حزبية بعيدا عن الإعتبارات الأخرى للجماعة ؟؟
طب هو إيه موقف الحزب من ترشح أحد عضواتة لرئاسة الجمهورية ؟؟؟
يعني بصراحة إيه موقف الحزب من الولاية العامة للمرأة ؟؟؟
طب شعار الحزب هيفضل " الإسلام هو الحل " ولا ممكن نقول شعار تاني
وبعدين صحيح سؤال أهم من ده كله
عضوية الحزب هتكون فيها عوامل تربوية ولا سياسية وبس ؟؟؟؟؟؟؟؟؟؟؟؟
ولو قلنا لازم يكون في تربية كأحد شروط العضوية والترقي الإداري للحزب طب الأعضاء الأقباط هنربيهم على إيه ؟؟؟؟؟؟؟؟؟
وسؤال مرتبط بالسؤال ده هي الجماعة هتروح فين لو قلنا إن الحزب هيكون مستقل وما فهوش مراقبة سياسية؟؟؟؟
طب مشروع الجماعة " العالمي " المرتبط بمفهوم أستاذية العالم المشروع ده مين هيرعاة لو تحولنا لحزب بشكل كامل ؟؟؟؟؟؟؟
طب الأهم بقى من ده كله
لو كونا الحزب هل هنحل الجماعة ؟؟؟؟؟
ناس بتقول لأ طبعا
طب الجماعة دي هتفضل سرية والحزب " الرسمي " بيتبعها ؟؟
ولا يبقى الحزب هو الكيان السياسي للجماعة ؟
والكيان التربوي يتحول لجمعية أهلية ؟؟
طب لو إفترضنا ده
إيه شكل العلاقة بين الجمعية الأهلية اللي بتقوم بدور تربوي وثقافي وإجتماعي بالحزب السياسي؟؟
طب إحنا الحزب بتاعنا هيكون مدني ولا ديني ولا مدني وله مرجعية إسلامية ولا حزب إسلامي وبس ؟؟؟
طب المرجعية الإسلامية هي الحفاظ على مقاصد عامة للشريعة ؟؟؟
ولا المرجعية هي شمولية كل شيئ ؟؟؟؟
طب الإسلام هو الحل إزاي نترجمة لتفاصيل الوضع في مصر من غلاء المعيشة والفساد المالي والإداري والسياسي ومشاكل إقتصادية زي البطالة ومعاناة العمال بعد الخصخصة والخصخصة دي من الإسلام ولا لأ وموضوع العشوائيات وغيرة وغيرة كتيييير ؟؟؟؟؟؟
طب برنامج الحزب هيكون الحفاظ على المقاصد العامة للشريعة الإسلامية وبس ؟؟؟؟
ولا هيكون الحفاظ على المقاصد هو جزء من برنامج الحزب وباقي البرنامج بيحل بشكل عملي وتطبيقي مشاكل الناس؟؟؟؟
للأسف لو طرحنا الأسئلة على مجموعة مننا كإخوان هنسمع إجابات غريبة ومتناقضة وأحيانا مش هنلاقي إجابات
واضحة وهنلاقي كلام غريب

ليييييييييييييية؟؟؟؟؟؟؟؟؟؟؟؟؟؟؟؟
لأننا من زمان وإحنا بنعلن مبادئ عامة بتحقق توافق اكبر وبنتجنب المبادئ التطبيقية
ولإننا عندنا خلفيات ثقافية مختلفة جيل من ايام الإمام الشهيد حضروا بطش الثورة وجيل تاني من السبعينات عاشوا نسبيا الحياة العامة ومتطلباتها وجيل في النص كده عاصر بداية الثمانينات وعاصر أفكار الجماعات الإسلامية ونشأوا في جو فكري متقلب وغير مكتمل النضج وشباب بيعيش واقع مجتمعي وسياسي وإقتصادي خانق بجانب معاصرتة لثورة المعلومات
ولإننا من كتر ما بنحافظ على حاجات معينة أصبح عندنا الوسائل هي المبادئ " الأهداف " والتمسك بالوسائل دي بقى من الثوابت يعني بتلاقي ناس بتتخض لو حد قلها ممكن نتناقش في تغيير شكل الجماعة
وناس بتتفزع لو حد قلها هناقش جدوى شعار " الإسلام هو الحل "1
والاهم من ده كله غياب الجانب التطبيقي للإسلام في حياتنا لفترة زمنية طويلة
مبادئ ولا وسائل ؟؟
هذكر بس موقف غريب
في إنتخابات 2005 كنت بسمع خطاب إنتخابي لأحد الإخوة المرشيحن ولقيتة بيقول " يا إخونا إنتوا لما بتصوتوا مش بتصوتوا على حد إنتوا بتصوتوا على لا إاله إلا الله "!!!!!!!!!!!!!!!!!!!1
مش عارف بصراحة إيه علاقة التصويت على الدكتور فلان بلا إله إلا الله
ليه الخلط ده اللي بيضرنا اكثر ما بينفعنا ؟؟؟
ولا التمسك بالشعار وصل لدرجة إننا نقول حاجات قد تكون موضع نقد شديد
إختلطت عندنا المبادئ والأهداف بالوسائل
فخفنا من تغيير الوسائل ظنا منا اننا نغير المبادئ !!!!!!1
عجبني في الموضوع ده مقال استاذ ضياء رشوان عن المراجعات

كل الأسئلة اللي فاتت لازم يجاوب عليها برنامج الحزب
عارفين إنه مش هيتوافق علية من النظام طبعا
بس البرنامج ده هو أول إعلان تفصيلي لمبادئنا كإخوان
ولسة لينا عودة عن الموضوع ده

أعتذر للجميع عن غلق المدونة لفترة طويلة "1 "