Thursday, June 7, 2007

دي سياسة من طرف واحد !!!! طب والحل ؟؟؟؟؟



وبعدين يا دكتور النظام ما بقاش عاوزسياسة خالص

وعلى رأي حضرتك






الريس بتاعنا طلع من الوحدة العسكرية لعالم السياسة مرة واحدة


مش معقول هيغير أسلوبة العسكري ويستخدم أسوب سياسي


يلا دامت لمين ؟؟؟




انا متوقع الرجالة يخدعوك وحد غيرك يمسكها


وهتبقى قصة نحكيها ليل ونهار





مش بردة ايام السادات كانت احسن يا دكتور عبد المنعم ؟؟




ولا حضرتك ليك رأي تاني يا دكتور ؟؟؟؟





الفكرة العامة للموضوع


يمارس النظام المصري انواع مختلفة من انوع القمع العسكري و يغيب في كل وسائلة اي وسيلة سياسية خاصة بعد التعديلات الدستورية

وفي المقابل يقاوم الإخوان بوسائل سلمية ومنها العمليه السياسية في الإنتخابات النيابية

وهو ما نسمية ممارسة سياسية من طرف واحد

فهل تنجح هذه الممارسة في إحداث تحول ديموقراطي ؟؟؟

هذا ما سنتحدث عنه مرورا بما يلي

- نظرة سريعة على إنتخابات الشورى

- موقف الإخوان
- موقف النظام
- الوضع الجماهيري
- البدائل المتاحة للعمل السياسي التقليدي

وفي النهاية نطرح السؤال الأهم
هل ستنجح الممارسة السياسية في مواجهة القمع العسكري ؟؟

وإذا كان للإخوان رؤية تخص ظرف إنتخابات الشورى سواء إتفقنا او إختلفنا معها
فما هي الرؤية على المدى البعيد ؟؟؟؟؟؟؟؟؟؟؟؟؟؟؟


في وسط الزحام بتاع إنتخابات الشورى عاوزين ما ننساش نبص للأمور بشكل كلي عشان الزحمة بتاعت الأعمال ما تخدناش للحاجات التنفيذية وننسى الرؤية الشاملة للأمور

على اساس واقع شايفينه لنظام بيمارس عمليات قمع عسكرية ضد ناس بتمارس عمل سياسي سلمي


سريعا مع الإنتخابات

هعرض لكم سريعا نماذج من اللي بيحصل

أول حاجة الشعار
الإخوان مركزيا قالوا شعار الإسلام هيكون شعار غير مكتوب على الدعايا عشان المشاكل القانونية
وعليه نزلت كل الدعايا وما فيهاش اي حاجة ممكن يقال عليها دينية
ثاني حاجة الدعايا


تعالوا ناخد كام محافظة كده كمثال
في دائرة جنوب الجيزة مثلا نزلت يفط و بكلم الأخ بتاع الدعايا في الدايرة قالي ده كل اليفط القماش إتشالت في نص ساعة على مستوى الدايرة بإستثناء كام قرية كده ما خدوش بالهم منها !!!1
يا خبر ابيض معقول ولا يافطة ؟؟؟؟؟


وفي دايرة شمال
بسأل واحد في الدعايا بردة قالي إحنا ناس ماشيين صح
الجماعة بتوع جنوب نزلوا قبل الموعد الرسمي للدعايا لكن إحنا هننزل رسمي
انا ضحكت قولت يعني هم شالوها عشان الموعد الرسمي ؟؟
المهم لما بدأت الدعايا الرسمي نفس اللي حصل في دايرة جنوب حصل في دايرة شمال
ونقدر نقول الدايرتين دول مافيش ولا ورقة دعايا موجودة للمرشحين في الشارع لحد دلوقت ولا بوستر ولا اي حاجة


خطف من الشوارع في الدقهلية



مكافئة للي يقطع الدعايا



في الغربية مش هنتكلم هنسيب الصورة تتكلم






شيخ الغفر في الغربية عاوز يلحق يسلم اليافطة بسرعة ويرجع يشوف غيرها قبل ما حد يسبقة


إنتشر خبر كده وما حدش متأكد من صحتة إن الداخلية رصدت مكافئة لكل اللي يجيب حاجة من الدعايا بتاع الإخوان يعني اليافطة الكبيرة مثلا 20 جنيه والبوستر 2 جنيه وهكذا وده خبر غير مؤكد لكن السعادة اللي بنشوفها في عيون العساكر بتدل على وجود مكافئة





ده إسمه كلام ده المرشح بيحارب عشان يسلم الورق ؟؟


مرشحي الإخوان
كلنا متابعين الأخبار وهنذكر كام خبر كده على سبيل المثال

مثلا في خبر
إعتقال المرشح عثمان دياب في الفيوم
المرشح تخيلوا معايا !!!!1


ولا إعتقال مرشح الإخوان في طنطا
وفي الغربية إعتقلوا حمزة صبري عشان هيقدم الورق
وفي دايرة شمال الجيزة منعوا المهندس سيد صالح وهو مرشح من إنه يخرج برة البلد بتاعته ولما بيخرج بيخلوا معاه بوكس قدام وبوكس ورا


وراحوا قدموا ورق بإن المرشحين بتوع الجيزة في عندهم مشكلة في الجنسية ورفضوا إنهم يخلوهم يدافعوا عن نفسهم

ده كله مش هيساوي حاجة جنب المرشح اللي راح يقدم ورقة فالضابط المسئول لعب معاه زي بتوع الأفلام قدم له شاي وحطله فيه منوم !!!!!ههههههههه والله حاجة تضحك وتحزن في نفس الوقت



طبعا غير مباحث التموين اللي بتروح للمرشحين !!!!1




بتاع امن الدولة هو اللي بيدير الإنتخابات




إعتقالات

اعداد ما لهاش حل انا هذكر على سبيل المثال


إن محافظة الجيزة معتقل منها 97 واحد من بداية الإنتخابات



وفي 600 على مستوى الجمهورية من بداية الإنتخابات
ولنا ان نتخيل معاناة اهالي المعتقلين من الرعب اللي بيشوفوة عند الإعتقال والبهدلة اللي بيشوفوها بعد كدة وهم بيتابعوا المعتقلين راحوا فين وحصلهم إيه

المتوقع

متوقع يوم الإنتخابات هيقفلوا اللجان واللي هيفتحوها هيزوروها واللي مش هيزوروها هيغيروها في الفرز واللي مش هيتغير في الفرز هيتغير في إعلان النتيجة
يعني مقففولة مقفولة من كل الواحي

النتيجة

لن يكون هناك اي تحرك في عملية التحول ديموقراطي على المدى القريب او المتوسط

موقف الإخوان

الإخوان دخلوا لعدة اهداف
- حتى تصل رسالة واضحة للنظام ان الإخوان ثابتين على موقفهم مهما تغيرت الظروف
- أول تجربة إنتخابية بعد التعديلات
- فضح ممارسات النظام واساليبة الجديدة


غير ان الإخوان يقفوا وحدهم الان في ميدان ضيق جدا تغيب فيه كل الحريات
وبيستخدموا الضغط السياسي لإحداث تحول ديموقراطي
ويدخلوا هذا المعترك السيسي بدون اي شعارت من النوعية التي يطلق عليها النخبة شعارات دينية



وهي رؤية تصلح للظرف الحالي وهو الإنتخابات ولكن الإخوان بحاجة لرؤية مستقبلية لمدى زمني اكبر
موقف النظام

الرجوع لقواعد اللعبة القديمة خاصة وأن امريكا لا تمانع من الرجوع لهذه القواعد
و أعطي لجهاز أمن الدولة كامل الصلاحيات لإدارة العملية الإنتخابية
وعلى المستوى الأكبر مجموعة صغيرة جدا لا تتخطى في عددها اصابع اليد الواحدة هي التي تدير العملية السياسية كلها في البلد بما فيها الإنتخابات
والنظام مش هيفتح الحياة السياسية لإنه بصراحة ما عندوش إستعداد إنه يشتغل في عملية سياسية حقيقية
و يريد ان يرسل رسالتين


الأولى يخدع فيها نفسة وبعض الشرائح من المغيبين سياسيا وهي


أن الإخوان حين تركوا الشعارات الدينية سقطوا في الإنتخابات لأنهم فقدوا التعاطف الديني
مع أن الحقيقة انه يقمع اي نحرك سياسي لهم


ويريد ان يرسل رسالة ثانية للنخبة بأن أي تحرك سياسي لابد ان يكون حسب القواعد القديمة وان كل التغيرات التي حدثت في الثلاث اعوام الماضية لم يعد لها وجود
أحزاب المعارضة
أظن ان اي حديث لا فائدة له عن شيئ غير موجود



ماسك الديوان وسمعنا إنك هتمسك الحزب ده غير البيزنس إيه مش هتسيب حاجة لحد من رجالتك ولا إيه ؟


الجماهير



كله بيجري مع الزمن عشان اكل العيش وكله بياكل في كله ولا حد ليه علاقة باللي بيحصل
بإستثناء 20 في المية كده بيتعاطفوا لما بتوصلهم الأخبار وتعاطفهم ده قلبي بس ما بيتحولش لعمل إلا لما الدنيا يكون فيها حرية شوية زي 2005






بيقولوا زكريا بيه هيمسك الحزب انا رأيي ترجع للشغلانة القديمة




الوضع
هناك صراع للنظام مع الزمن حتى يزيد من قبضتة قبل حدوث اي شيئ للرئيس


الإخوان يمارسوا الضغط عن طريق عملية سياسية للوصول لتحول ديموقراطي حقيقي



والنظام
يرد بوقف الإخوان بكل أساليب القمع غير سياسية بما فيها الإعتقالات ومصادرة الأموال والمحاكم العسكرية وغيرة وغيرة

إذا هل سيصلح الدفع السيسي بشكلة الحالىفي مواجهة البطش العسكري ؟؟؟
وإذا كانت الإجابة بلا فما هي البدائل ؟؟




البدائل المتاحة



البديل السياسي الحالي المتمثل في الإنتخابات اصبحت ابعادة واضحة وليست بحاجة إلى تفصيل
لننظر معا إلى البدائل الأخرى وهذه البدائل ليست للإخوان فقط بل لكل القوى
وأحب التأكيد على أنه تحليل شخصي
1- تحرك عسكري في مقابل البطش العسكري
وده الإخوان بيرفضوه وكل الناس بترفضة وتجربة الجماعات المسلحة كانت سيئة جدا وكلها اخطاء
2- تحريك الشارع ناحية عصيان حقيقي يضغط النظام العسكري ده ويخليه يتنازل شوية يعني تشجيع الإضرابات العمالية تحريك مظاهرات حقيقية
لكن السؤال هتحرك الناس إزاي وهي اديلها سنين ما تحركتش
واخر حركة حقيقية كانت في السبعينات من 30 سنة والناس مش مستعدة تشارك ولا تمشي في الشارع متر واحد ولو مشيت ما حدش هيقف قدام العربية الفهد ولا قدام العصيان اللي ماسكها العساكر مع اول ضربة كله هيفلت وهيفضل شوية هم اللي هيشيلوا المواضيع كلها
3- الصفقات
ودي ممكن تكون
خارجية
عن طريق عمل حوار حقيقي مع دول خارجية تساعد في الضغط على النظام المصري
ومشكلة الخيار ده إن الخارج ليه اجندة خاصة ولازم يحصلعلى مقابل مساندة القوى اللي بتسعى للتحول الديموقراطي
لازم في المقابل هيكون في حاجدة وبالتأكيد على حساب بعض مصالح الوطن
أو
تكون بصفقات داخلية
بحيث ينظر النظام ماذا سيأخذ وما سيعطي للشعب ؟
يعني مثلا النظام عاوز يورث جمال بس يسيب الحكومة تيجي بشكل ديموقراطي
لكن الخيار ده مشكلتة إنه النظام في إيده كل حاجة يبقى هيتنازل ليه ؟؟؟؟



4- إنتظار ثورة الجوع و الفقر ده إحتمال بيتكلم فيه البعض إن القاهرة محاطة بحزام ناسف من العشوائيات ومصر كلها هتعاني من ازمة إقتصادية حقيقية يتحرك فيها الناس بشكل عشوائي


لكن ده خيار عشوائي ومخاطرة كبيرة جدا ممكن تصل لدرجة إنهيار حاجات كتييرة جدا وخراب البلد بجدوإنتظارة نوع من انوع السلبية خاصة وإنه مش هيكون منظم ولا مرتب ولا هيكون ليه قيادة مسئولة

في الحقيقة
الخيارات عاوزة دراسة كويسة
لكن اي خيار لازم يصحبة تحرك شعبي حقيقي عشان اللي بيتحرك يكون في إيدة ورقة شعبية بيضغط بيها
هنذكر تاني
هل ممارسة السياسة من طرف واحد ستؤدي لتحول ديموقراطي حقيقي ؟؟؟
لو كان الجواب لا
إزاي نحرك الناس ناحية ضغط شعبي حقيقي ؟؟؟
إيه مدى إمكانية عقد صفقات بين القوى السياسية المختلفة والنظام ؟؟؟
كلها اسألة لازم نجاوب عليهالإن الإنتخابات دي بتقول خلاص ما فيش تحرك ديموقراطي على الأقل حاليا



و إذا كان للإخوان رؤية في إنتخابات الشورى فماذا بعد الشورى ؟؟؟


وهل ستنجح المقاومة السياسية في الإنتخابات النيابية من طرف مقابل القمع العسكري من طرف اخر في إحداث تغيير حقيقي في مصر ؟؟؟؟؟؟؟؟؟؟؟؟؟





42 comments:

Anonymous said...

تحليل موفق والله يا باشمهندس
انا عندى تعليق واحد اى نظام ديكتاتولرى وظيفته قمع المعارضين ليه دى طبيعته
انا بلوم هنا المعارضين اللى هما الان الاخوان احنا من سنه 95 لم نغير الياتنا فى العمل السياسى وراضين بالدور اللى بنقوم به
وبنتفرج على نفسنا واحنا كل يوم بيتحول 40-50 واحد للمحاكمات عسكريه
انا متهيلى احنا الان سبب التدهور والقوانين الظالمه اللى بتتفصل لينا كل يوم بدون التفكير فى تغير الياليات العمل

mohamed said...

سعد زغلول قالها زمان

مفيش فيادة يا صفية ..غطيني وصوتي عليا

البدائل كلها تعني شئ واحد

وهو الصدام

وانا مش متوصر ان الشعب المصري بتاع صدام خالص

مش دا الشعب اللي يعمل ثورة

انا مش متصور ازي قام بثورة 19

عصفور المدينة said...

الله المستعان
هو حضرتك وصلت لحقائق براجماتية جدا
بس فيه مشاكل كثير راكدة عن عمد والمشكلة الاقتصادية متغطي عليها بتثبيت سعر الدولار
وتخيل إن الإخوان ما دخلوش والمجلس بقى كله وطني ومفيش أي معارضة ما هو المشاكل الموجودة بخارها يخنق
دي مش دعوة للانتظار ولكن نظرة على عناصر لازم تؤخذ في الاعتبار

م عبدالرحمن said...

يبقى انت اكيد فى مصر

اكيد صعب تلاقى المستوى الامنى العالى فى بلد عير مصر

لكن هناك دائما ثوابت
ومبادئ بنيت عليها الجماعة

واعتقد اننا فى وسط هذا الحال الصعب
علينا ان نزيد من تمسكنا بثوابتنا و مبادئنا وقيمنا

واظن ان الجماعة و الشعب المصرى قد مر بظروف مشابهة و ربما اكثر شدة بالنسبة للاخوان خاصة
ويشاء رب العزة ان تستمر هذه الجماعة
و ان تخرج من السجون لتولد من جديد

مادمنا اصحاب مبادى و ثوابت

ان المبادئ لا تموت بخسارة مقعد
فى مجلس
او خسارة مجلس بكامله

ما دمت تعمل فى طريق الله
فانت بتكسب كل يو ارض جديدة
و ناس جديدة

واجر جديد من الله سبحانه وتعالى
وخطوه على الطريق الصحيح

محمد البرلسى said...

السلا م عليكم
الاخ العزيز المهندس
احيك على الطر ح وعلى البوست خصوصا فى موضوع البد ائل واننا بالفعل يجب ان نفكر نظره مستقبليه لكيفية سير الصر اع وادا راته مع النظا م بعقليه اكثر تفتحا وقدره على المر اوغه والحسم
احيك بشده

محمود سعيد said...

والله كلام حضرتك ولأول مرة ممكن أختلف مع كتير منه
انت قلت أنه
الإخوان دخلوا لعدة اهداف
ونسيت أهم الأهداف
احنا بنخش الانتخابات كوسيلة تواصل مع الناس وتعريف بفكرتنا وكهدف فى نفس الوقت زى ما ذكرت بخصوص الاهداف اللى انت قلتها

بس للأسف لا أحد فى مصر
ولا أظن حتى الحزب الوطنى
لديه رؤية مستقبلية
ولا أعرف إن كان للإخوان هذه الرؤية أم لا

بس بخصوص البدائل اللى انت بتقول عليها
البديل بتاع ثورة الجوع ده
ده بديل خطير جداً لازم نسبقه لأن لو جاء هتبقى مصيبة على مصر

هتبقى انفلات وفوضى و لن يكون لأى كيان أى وجود سوى الحاجة الإقتصادية
هيكون إنفجار شعبى ولن يكون لأحد إمكانية أن يسيطر عليه إلا إذا كان صاحب رصيد سابق ومقبول من الشعب كله

لذلك أظن ان اللى الاخوان يعملوه إنهم يجهزوا للموضوع ده
ويكبروا دايرة قبولهم لدى جموع الشعب
اللى ضيقة دلوقتى نوعاً ما

ولننتظر كلنا الإنفجار

لأن كل البدائل اللى انت قلتها لن تحدث مالم يرد الله لنا غير ما نتوقع

Anonymous said...

الاسلام هو الحل

اسلام رفاعى said...

اعتقد ان كلام حضرتك سليم ان اى تحرك لازم الشعب يتحرك معاه فعلا

واحد من الإخوان said...

المجهول
انا أظن إنك الكتور ......لكن مش هقول
المهم
فعلا لازم نشوف حاجة بديلة عشان عمليات القمع العسكرية اللي شغالة دي على الأقل
واتمنى اسمع رأيك في البدائل المكتوبة او لو في بدائل عندك

وشكرا على مرورك وتعليقك

------------------------------

الأستاذ محمد عبد العاطي

منور المدونة
بصراحة إنت إختصرت حاجات كتيير قوي في كلمة الصدام
وانا معاك إن شعبنا ما بيتحركش
يبقى لازم نوجه كل نشاطنا ناحية إننا نخلي الشعب يتحرك بدل ما نوجهه لأي حاجة تانية وساعتها هنكون قطعنا معظم الطريق

وشكرا جزيلا على المرور والتعليق

اه صحيح
هو سعد قال صفية صوتي عليا ؟؟؟
ههههههه
محمد حمزة

Anonymous said...

اعتقد انك قمت بسرد عدة مشاكل في مجتمعنا وبدون وضع حلول لهذه المشاكل طيب ماتيجي نمشي في خطوات علمية لحل هذه المشاكل واعتقد ان البدايه هي ان نحدد اعراض اومسببات هذه المشاكل وهي اولا الشعب والذي ذكرت ان هناك نسبه كبيرة منهم لا تتحرك وذلك لان هذه النسبة الكبيرة لم يتم اشباع الاحتياجات الاساسية لها والمتمثلة في الاقتصاد والتي ايضا تمت محاولات حلها من قبل الاخوان من خلال المشروعات المختلفة ولكنها ايضا حوربت من قبل الحكومة طيب ايه الحل لما تعرفه ابقي قولي والطرف الثاني لهذه المشكلة هي الحكومة والتي تسعي لاشباع الحاجة الخاصه بتحقيق الذات ولكن علي حساب الشعب فتعمل ايه عشان كده تقوم تسرق وتبهدل وتفرض السيطرة علي مين غير الشعب طيب برده اييييييه الحل مش عارفه عامة ربنا يعين الكل ماعدا الحكومة

مسـتنـية الفـرج said...

تحليل بليغ اخ محمد ينبيء بنواة ضياء رشوان الجماعة(:

بس صراحة أنا ساعات بقول لم يكن من المفترض أن يخوض الاخوان انتخابات الشوري من الأساس ؛ده لأن صلاحيات عضو الشوري ليست بالقدر الذي يجعل البهدله بتاعة الاعتقالات والصرف والضرب والاهانه مبرره، خصوصا أن الأخوان دخلوا ب19 عضو اساسي ،
نصفهم هيطير علي الأغلب قبل الأنتخابات وذلك بعد استدعاء اللجنة العليا للانتخابات لسبع منهم وقررت استبعاد أول واحد فعلا وهو عبد المحسن قمحاوي ورفعت الامر للمحكمة الأدارية العليا وهتنظر القضيه بكره؛ فكده عندنا 6 غيره تحت التهديد
يعنى تبقي 12
طيب بعد الانتخابات كمان وبعد الزوير اظن علي الاكثر هينجح 5
يبقي كل الليله دى عشان 5!!
إذن هى محاوله من الأخوان لفرض اسمهم علي الأحداث؟.

واحيانا اقول كان المفروض ان الاخوان يتنازلوا عن الشعار اللي يشبه حجة البليد للحزب الوطنى؟ لكن صراحة حسب علمى تم ترك القرار للمرشحين و كمان بتوع الوطنى نزلين بآيات ومحدش كلمهم فده معناه انها تلكيكة وبس ولو مفيش تلكيكه بيلفقوا وبيصنعوا تلكيكه ويطبعوا ورق باسم الاخوان وفيه كلام انهم اخوان ويلزقوها لهم.

أحيانا أخري اقول الاعتقالات بسيطه في تأثيرها وهتعدي ومن المهم ان الاخوان يكونوا حاضرين في كل الاحداث ومشاركين فيها؛ فضلاً عن اهمية استثمار وجود ال88 عضو تحت قبة البرلمان ؛ كما يجب أن يستثمروا زيادة سطوع نجم الاخوان دوليا نتيجة احداث المحاكمات العسكرية اللي جعلت منظمات حقوقيه ودولية تتبني قضايا الاخوان بشكل أو آخر,

النهاية الاخوان نزلوا ولكن السؤال بقي ليه الاخوان دخلوا ب19 عضو مداموا شيفينها مهمة وكدة كده في بهدله واعتقالات؟

واحد من الإخوان said...

لأخ الكريم عصفور المدينة

لست ضد الإنتخابات ولكن حديثى حول التفكيير في بدائل أخرى تكون اكثر فاعلية لتحريك النظام من المكان الذي يسيطر علية بشكل كامل حتى يقبل بفتح مسارات حقيقية في الجانب الديموقراطي

وفي النهاية دايما مشرفنا يتعليقك مع إني مقصر معاك

----------------------
المهندس عبد الرحمن حسين

منور المدونة في اول تعليق ليك

هي الجماعة ليها ثوابت فعلا
وبناخد ثواب فعلا
لكن أرض جديدة دي محتاجة مراجعة
لإن الكلام على الأرض الجديدة
إحنا على المستوى السياسي بنخسر دلوقت الأرض اللي معانا
وعلى المستوى الشعبي الرصيد بتاعنا زي ما هو بدون تغيير
نفس النسبة اللي كانت بتأيدنا زي ما هي
لكن باقي الناس
مغيبة تماما


والكلام عن إننا إزاي نجيب الناس المغيبة دي
واللي هي بتمثل الأغلبية فعلا

وكمان إزاي نضغط النظام عشان الشعب يحصل على مكاسب حقيقية ؟؟

على كل حال مرحب بيك في مدونتك

محمد حمزة

واحد من الإخوان said...

الأستاذ محمد البرلسي
القادم من الريف

فعلا نحن بحاجة لبدائل تكون اكثر مرونة واضيف اكثر فاعلية للتعامل مع النظام

وكما تحييني بشدة فأان اشكرك بشدة على زياراتك ومتابعتك وتعليقك

--------------------------
الأخ محمود سعيد
ما فيش خلاف ولا حاجة
إعتبرها إضافة انا موافق عليها
لكن الكلام مش خلافي حول الهدف من دخول الإخوان المسلميين للإنتخابات

لأ

الكلام عن إننا زي ما إخترنا الإنتخابات كوسيلة من فترة
محتاجين نفكر في وسائل تانية اكثر فاعلية في عملية الإصلاح
وده مش معناه بردة إني الغي وسيلة الإنتخابات
معناه التفكيير في وسائل أخرى والمقارنة بينها وبعدين نحدد اي الوسائل افضل
وبعدين
انا لي وجهة نظر إن تحريك الناس والوصول بيهم لدرجة ولو صغيرة من الإيجابية في التحرك
المنظم لعمل ضغط شعبي على النظام
انا رأي الشخصي
الجانب ده المفروض نديله جهد كبييير جدا لا يقل عن الجهد اللي بنبزلة عشان نوصل افكارنا اللي بنتبناها

أما موضوع العصيان العشوائي او ثورة الجوع
فأنا اتفق معك ايضا انها ستكون خراب للبلد لأنها ستكون بدون قائد وبدون حدود
لكن ما المانع ان يكون الإخوان هم القائد لها
او لنقل " الموجهه " لهذه التحركات
وغن كانت بإسم غير ثورة الجوع عشان ما حدش يمسك في الإسم ويسيب المعنى


وشكرا على تعليقك وعلى إختلافك الغير موجود


محمد حمزة

Anonymous said...

السلام عليكم ورحمة الله وبركاته
اولا احب ان انوه عن مدى اعجابي الشديد بمدونتك وما تتناوله من مواضيع شيقة ولها طابع خاص من حيث انها تعبر عن مابداخل خواطرنا وعقولنا وكثير هي قريبه من افكارنا والمواضيع بداخلها تتميز بالسلاسه والسهولة والفهم
ثانيا بالنسبة للموضوع الحالى ماشاء الله عليك تناولته بشكل رائع من الناحية السياسية والمتمثلة في رؤى كلا من الاخوان والحكومة والشعب من الناحية السياسية ولم تناول الناحية الاجتماعية واعتقد ان معظم الشعب ما يهمه الان هو الجانب الاجنماعي بدء من الفلاح الى المثقف لان كثييييييييير من الناس لاتهتم بالسياسة او بمعنى اخر ما بتحبش توجع دماغها
فانا من راي وانا متفقة ايضا مع رايك انه لازم نحرك الشعب ازاي عن طريق ان احنا ندخل من الجانب الاجتماعي اليهم ومن هنا نبقى مسكنا العصاية من النصف
وعن طريق الاتي بدل من المصاريف الباهظة في الانتخابات بلا جدوى ممكن نقيم الاتي
1- اقامة جمعيات خيرية تتضمن الاتي(حفظ القران الكريم - مساعدة الايتام- اقامة معارض بجهود ذاتية من خلال الاعمال اليدوية الخ )مثل جمعية الرسالة او صناع الحياة
عمل جمعيات لمساعدة الراغبين على الزواج تتضمن قسم خاص بحلول المشاكل الزوجية مع ندوات خاصة بوعي المقبلين على الزواج من جميع الجوانب
اقامة فصول تقوية خاصة بالطلاب مع امكانية توافر الكتب الخارجية او الورق حتى لوكان مستعمل من فبل
حل مشكلة البطالة من خلال اعطاء حلول عملية للشباب لاقامة المشروعات الصغيرة وكيفية تنمية الموارد البشرية لديهم
وغيرها من الحلول الكثييييييييييييييرة
ومن هنا نستطيع ان نتوغل داخل الشعب وعلى الاقل نشبع اليهم رغباتهم البسيطة وما اكثر نسبة حاجة تلك الشعب للمساعدة

Dr cool بادّن في مالطا said...

السلام عليكم و رحمة الله

جميل أوي يا بشمهندس عرض البدائل بالشكل ده و كمان عرض صعوبات أو مشاكل كل بديل .

عايز أعلق على أكثر من رد الصراحة و في وسط ما أنا باعلق هاقول رأيي برضه




أولاً : بالنسبة لرد الأخ محمد عبد العاطي ،،

فعلاً واضح إن البدائل كلها تدور حول الصدلم بشكل أو بآخر و لكنني أرى أنا الصدام أصبح حتمي سواء على المدى القريب أو البعيد ، أنا لا أشجع بكلامي هذا على الصدام و لكن أراه أصبح حتمي من خلال قرائتي للواقع الحالي .


ثانياً : الأخت منة الله

مش عارف يعني إيه الإسلام هو الحل ،، أعتقد إن حضرتك كتبتيها بشكل ساخر ، و أعتقد أن الشكل الساخر هو الشكل الوحيد الذي قد يصبح مقبولاً هنا .


ثالثاً : الأخت صاحبة التعليق اللي فوقي ده على طول ،،

عايز أعلق على الكلمة دي


-----------------------

عن طريق ان احنا ندخل من الجانب الاجتماعي اليهم ومن هنا نبقى مسكنا العصاية من النصف

-----------------------

مش عارف ليه حسيت من الكلام ده برائحة الرشوة السياسية أوي ، إحنا لازم نعمل كده بس مش من المنطلق ده





أخيراً ،، أقول وجهة نظري و اللي قعدت أفكر لحد ما وصلتلها من ساعة ما البوست ده نزل ، و هي وجهة النظر التي قد تغيب عني أحياناً .

و هي ، الاستكمال و التكميل ،

احنا ممكن نبص على الوضع الراهن و نسأل سؤال ، مين ممكن يقدم أي حاجة ؟؟؟؟؟

اللي ممكن يقدم حاجة هما الإخوان و بعض التيارات السياسية و التي هي ضعيفة أصلاً .
إذاً الإخوان هم الفصيل السياسي الأكبر على الإطلاق الذي يستطيع تقديم شيئ لمواجهة النظام ، أياً كان هذا الشيئ و حجمه .

من هنا أرى أن جزءاً من الحل هو العمل على توسيع التنظيم و ضم أكبر عدد ممكن من الناس إلى التنظيم و العمل بشكل قوي على هذا الشأن و توجيه الطاقة الكبرى للإخوان في المرحلة القادمة إيه ، قد ترى أن تحريك الشارع مهم جداً ، أقول لك أن هذا التوسيع هو نوع قوي من أنواع تحريك الشارع إن لم يكن الأقوى .
ده بالنسبة لينا كإخوان



أما بشكل عام ده هو ثانياً

ثانياً : رفع درجة الوعي لدى الشارع المصري ، و في هذا الإطار من الممكن أن أقول أنه لابد أن يتخذ الإخوان من قضية مثل قضية محو الأمية في مصر قضية استراتيجية ، لأن النظام يهمه أن يظل الشعب في أمية شديدة حتى يكون تغيبه عن الواقع أو عن قضايا الأمة أمر سهل و ميسور ، و بالتالي أرى أيضاً أن يوجه الإخوان جزء كبير جداً من نشاطاتهم إلى محو الأمية و رفع درجة الوعي الثقافي و السياسي لدى الشعب ، ثم عندما يكون لدينا شعباً مثقفاً و واعياً تستطيع أن تثق في خيارات هذا الشعب حتى و إن لم يختار الإخوان .



لكن السؤال اللي عايز أسأله لك يا بشمهندس ،

هو السؤال اللي انت سألته ،،

إزاي نحرك الناس ناحية ضغط شعبي حقيقي ؟؟؟

ياريت تقول لنا رؤيتك في الموضوع ده .

جزاك الله خيراً

محمود سعيد said...

تصدق كلامك ده فتح عليا تفكير

هل نركن العمل السياسى اللى انا شايف أن بسببه نضجت الجماعة نضج كبير جداً

نضجت علشان اخدت الحياة من كل جوانبها ليس إلا

المهم هل ناخد أجازة من السياسى علشان نحفظ لنفسنا قبول الناس لما يحصل الإنفجار (بلاش ثورة الجوع)

بس لاقيت أنه النظام عمل أحلى شغل معانا
بهدل ومرمط عضو مجلس شعب

ما أهو أصل فى حاجة انا خايف منها
الناس اللى بتقول الاخوان والنظام الاثنين وحشين

ازاى نخليهم يقولوا النظام بس


يبقى دلوقتى مرمطة عضو مجلس الشعب فى الطين علشان هو إخوان
وقبلها إعتقال 2

ده إن أحسنا تصييته إعلامياً

هيكون لينا حماية من كلام طبيعى يصدر من الناس ان الإخوان مثلاً دخلوا المجلس علشان مصلحتهم مثلاً
وأن العضوية مثلاًً كأنها حصانة من الاعتقال والمرمطة

يبقى لازم نحسن بس توضيح صورتنا

وكلامك على أننا ندفع الناس لشوية إيجابية

بكل تأكيد ده منهج الإخوان أساساً
مش المفروض ده ناتج التربية ولا إيه

Anonymous said...

السلام عليكم وحمة الله وبركاته
اولا معذرة اقدم هذه الرسالة dr cool
ردا على ماقاله في التعليق اولا انا لم اقصد ما قلته بالمرة من خلال ان امسك العصاية من النصف اقصد بها ان اكون جمعت اكبر طائفة من الشعب سواء المهتمين بالسياسة او الغير مهن\تمين بالسياسه وان نصل الى فكرهم واهتمامتهم ولم اقصد بالمرة ماقلته من ناحيةالرشوة السياسية كما زعمت حضرتك اما بالنسبة الى تعليقك فوجدت بصراحة وليس ردا على ماقلته لم يضيف شئ جديد من الحلول الجديدة وتجدها ايضا تقع تحت اطار الجانب الاجتماعي بل بالعكس انت حجمت الموضوع على محو الامية هل تقصد به محو اميه من ايه ولا ايه ولاايه الخ وهذا حل يعتبر ايضا معذرة طويل المدى ونحن في الاسف في عصر السرعة فيه هي الحكم

Anonymous said...

أنا حاسه ان كثير من أفكارى تتفق معاك ومع تعليقات الأخوة الأفاضل وفى الحقيقه من واقع دراستى ان الانسان له مجموعه من الحاجات تكون مرتبه بشكل هرمى ولا يستطيع الانسان الانتقال من مستوى الى مستوى أخر دون اشباع المستوى الأول من الحاجات التى أولها الحاجه للطعام والمسكن والملبس ياترى الشعب أشبع هذه الحاجات احنا ياحاج محمد لسه واقفين فى طوابير العيش بنتخانق على الشلن والبريزه يعنى احنا شعب جعان وتعبان هتيجى دلوقتى تكلمه على الحريه فى الرأى مع العلم على أن الحريه لا تتضمن انتخاب الاخوان المسلمين وانما تعنى انتخاب العضو اللى يصلح ويكون معبر عنهم وعن أرائهم وأفكارهم وحكومه تعمل من أجل الشعب وتتقى الله وليس من أجل المنصب مع احترامى للجميع فان الاخوان من الصعب الوصول لأهدافهم لأنه لاتوجد أصلا قاعده فكل يعمل فى اتجاه مضاد للأخر فالحكومه تحارب الاخوان دون أن تسمع لهم والاخوان يعملون مع حكومه فاسدة همها الوحيد المنصب والمال والشعب ضائع فى النصف ولكى تكون هناك جدوى من العمل من الأجل الاصلاح يجب أن يكون النقد بناء مع وجود حكومه ديمقراطيه تعمل من أجل الشعب معذرة على الاطاله والسلام ختام

Dr cool بادّن في مالطا said...

السلام عليكم

أعتذر أختي الكريمة ، حضرتك فهمتي كلامي غلط شوية أو بمعنى أصح حضرتك لم تأخذي بالك من الكلام مكتوب ازاي



أنا لم أقل إن حضرتك تقصدي مسألة الرشوة السياسية و لكن أنا قلت إني شامم من الكلام ريحة رشوة سياسية ،

يعني أقصد أن أقول لحضرتك إن الكلام لا يجب أن يقال بالشكل ده لأنه يعطي إيحاء بالرشوة السياسية ، و أقصد أقول إن الكلام اللي حضرتك قولتيه أنا موافقك عليه كله و معاه 100% و لكن يكون من منطلق النهوض بالشعب و بوضعه الثقافي و الاجتماعي ، و بالتالي المسألة مش مسألة إني بادخل للشعب من مدخل معين يقربني ليه ، لأني مش محتاج إن الشعب يتحرك معايا لأنه قريب مني و لكن محتاج إنه يتحرك معايا لأنه مقتنع زيي بالفكرة .

و أنا أعتذر مرة أخرى فأنا لم أسيئ الظن بكي أختي الكريمة و أفهم سلامة نيتك ، و لكن أقصد أن أوضح المنطلق الصحيح حتى لا يفهمنا الآخرون خطأً



أما بالنسبة لموضوع محو الأمية ، فأنا ذكرت ذلك على سبيل المثال و هذا واضح جداً في كلامي و مكتوب صراحة أن هذا مثل و هذا نص كلامي ( لابد أن يتخذ الإخوان من قضية مثل قضية محو الأمية في مصر قضية استراتيجية ) و أيضاً و ضحت أن الأمر لا يقتصر على محو الأمية بل المسألة هي مسألة رفع مستوى الوعي الثقافي و السياسي لدى المجتمع .


أما بالنسبة لأني لم أقل شيئاً جديداً ، فأنا أعترف بذلك أنا لم أقل جديداً ، أنا أنبه إلى شيئ معلوم و لكن مُتجاهل بالرغم من ضروريته فقط هذا ما فعلته و هو أيضاً ما فعله غيري فلم يأتي أحد بجديد حتى الآن ، كل الأمر أنني أشدد على أهمية أمور قد نكون غافلين عنها أحياناً ، بل نحن بالفعل غافلين عنها ، فموضوع الاستكمال و التكميل يحتاج لاهتمام أكثر من الموجود بكثير جداً و أيضاً مسألة تثقيف الشعب و زيادة وعيه يحتاج لمجهود أكثر من الموجود حالياً بكثير ، و لا أقول أنا هذا هو كل شيئ نستطيع القيام به و أن هذا هو السبيل الوحيد إطلاقاً ، أنا أعدد أشياء و حضرتك تعددي أشياء و البشمهندس يعدد أشياء و غيرنا يعدد أشياء و في النهاية يصل كل منا لرؤية أكبر و أشمل من التي كان يمتلكها قبل أن نتناقش و يستفيد كل منا برأي الآخر .


جزاكم الله خيراً و أعتذر إن كنت أسئت استخدام الكلمات .



مستني ردك على السؤال يا بشمهندس .

Anonymous said...

اخي المهندس محمد
جزاك الله خيرا تحليل جيد
بدايه بالفعل انا معك فالاسلوب الذي تمارس به الحكومة السياسة في الوقت الحالي
لا يعطي اي مساحة من مساحات العمل السياسي
وبخصوص الخيارات ان شخصيا اراهن علي الخيار الثاني
فالامل في هذا الشعب الذي ازعم انه بدأ يتحرك
حيث ان المشكلة وصلت للقوت اليومي
وصلت كل بيت ... كل اسرة
دونرنا ان نتواجد في المجتمع داخله
نبث فيه روح الامل والتغيير
نشجعه علي ان يرفع صوته عاليا
يرفض الظلم
يرفض الفساد
يطالب بحقوقه
يعلنها مدويه
الاسلام هو الحل
يعلنها صريحة
ارحلوا عنا
والله الموفق
والله اكبر ولله الحمد

FadFadA said...

يقترح أحمد مطر حلا رائعا فيقول

أنا لو كنت رئيساً عربيا
لحللت المشكلة
و أرحت الشعب مما أثقله
أنا لو كنت رئيساً
لدعوت الرؤساء
و لألقيت خطاباً موجزاً
عما يعاني شعبنا منه
و عن سر العناء
و لقاطعت جميع الأسئلة
و قرأت البسملة
و عليهم و على نفسي قذفت القنبلة

محمد

فوضى منظمة said...

جزاكم الله خيرا ..على هذا التحليل ..أنا رأي أننا نعني من مشكلة رئيسيةوجوهرية..تتمثل في اننا جكماعة اخوان لم نرتقي بعد الي ان نكون جماعة ضغط وأرى أن هذا يجب أن يكون هدف رئيسي واضح لدى الاخوان في الفتره القدمة ..سواء بابتكار وسائل جديده للوصول والتواصل مع الناس..وسائل جديده لكسب النخب الساسية المحلية والعالمية في صفنا وتوضيح اننا بديل مطروح بشكل ما للنظام وذلك بتوضيح الجانب المظلم أو غير المرئي للاخوان بأي وسائل ..محاولة التواصل الجيد مع منظمات المجتمع المدني الداخلية والخارجية بشكل ما..وامتلاك ذراع اعلامي قادر بشكل ما على الضغط على المظام وفضح ممارساته ومساوؤه للمجتمع المحلي والدولي

يعني من الاخر لازم نتحول الي جماعة ضغط ..أزاي.. ده لازم نفكر فيه ونوصله باسرع وقت

بالتوفيق

ومضات .. أحمد الجعلى said...

قرات الموضوع فور وضعك له يا باشمهندس، وفضلت أن اترك الأيام لتجيب عن أسئلتك بخصوص مجلس الشورى وأعتقد ان الإجابة باتت واضحة وكلها ساعات وتصبح موثقة أيضا.

اما عن الحال والمخرج فاعتقد أن التوسع الأفقى لكسب مساحات جديدة للحركة أصبح يضيق بشكل بشع فى الآونة الأخيرة بالطبع علينا أن نبحث عن مساحات جديدة أفقيا لنتحرك من خلالها مثلا مثلا كفكرة الاتحاد الحر فى الجامعات وفكرة التدوين و.. و..
ولكن فى ظنى الأهم الآن والذى يجب أن نعيطه من وقتنا وجهدنا مساحة أكبر هو التوسع الرأسى، بحيث نطور من وسائلنا المتاحة ونجعلها اكثر تأثيرا وفاعلية كيف نستفيد من التدوين بشكل أفضل كيف نستفيد من النت ؟؟ كيف نستفيد من النواب؟؟ كيف نستفيد من مظاههرات وحركة العمال الأخيرة فى الشارع المصرى؟؟ كيف نستفيد من الاحزاب وقوى المجتمع المدنى والمفكرين ؟
بالطبع حينما اتساءل كيف نستفيد فضمير المتكلم عائد على كل من يريد الاصلاح فى مصر ويتمناه وليس المقصود بالضمير الإخوان المسلمين فحسب.

على اى حال أعلم أن بحثك من منطلق المعطيات السياسية وليس بناء على العقائد والإيمان بقدرة الله عز وجل على تغيير الأمر فما بين طرفة عين وانتباهتها يغير الله من حال إلى حال
ولكنك قدمت الدراسة من باب اعقلها وتوكل، وأحسب أيضا انه بعيدا عن الجانب العقائدى أن اطراف المعادلة متغيرة بشكل بشع وهو فعلا ما يمكنه أن يغير الأمر من حال لحال ما بين طرفة عين وانتباهتها سواء كانت اطراف المعادلة هذه هى السياسة الخارجية أو التطورات الداخلية .. ومن يدرى ماذا تحمل الأيام ؟؟؟

Dr cool بادّن في مالطا said...

السلام عليكم

إيه رأيك كده يا بشمهندس

أدينا شوفنا كل حاجة على أرض الواقع ، و لا اتنقلت لنا على شاشات التليفزيون المصري المنافق و لا على الفضائيات المتجنية يا عيني ، كله كان على عينك يا تاجر


يبقى خلاص ، النحية دي اتسدت

لكن مافيش شك إن الانتخابات كانت مهمة و تجربة جيدة للاحتكاك بالجمهور ، صحيح مش كان الاحتكاك قوي زي ما حصل في انتخابات مجلس الشعب ، و لكن على الأقل الناس شافتنا و عرفت إننا موجودين مش عبارة عن سطور في صحف أو خبر في قناة فضائية . على الأقل لو حصل في المستقبل تحول ديمقراطي يبقى احنا كنا موجودين مع الناس من الأول و مش طلعنا فجأة


نفكر بقى يا باشا في البدائل ، أعتقد إن ده دور الجميع في الفترة القادمة ، و باقترح على مستوى الإخوان أن يتم عمل ورشة عمل على مستوى الجماعة ككل بدءاً بالقاعدة العريضة و وصولاً إلى القيادة العليا حول البدائل في الفترة القادمة و عن كيفية التحول الديمقراطي في مصر




صحيح قبل ما أنسى

المدونة الجديدة أهي

http://baddan-fee-malta.blogspot.com

بادَّن في مالطة

ابقى تعالى ادن معايا و نبقى نصلي سوا :)

واحد من الإخوان said...

المبدعة منة علام
مرحب بيكي زائرة ومعلقة
هو واضح إنك رفعتي الشعار على سبيل إنه هو الحل
لكن إحنا كنا بنتناقش في بدائل تطبيقية
هو الشعار كويس
لكن عاوزين نترجمة لواقع نشوفة في البدائل

ومرحب بيكي دايما
----------------------
الأخ إسلام رفاعي
بالظبط هو ده الكلام من الأخر فعلا إحنا لازم نحرك الناس
لإننا واقفين لوحدنا
وشكرا على التعليق والزيارة

محمد حمزة

واحد من الإخوان said...

المجهولة رقم واحد
جزاكم الله خيرا على التعليق

هو إحنا هنا بناقش الحلول
لمشكلة رئيسية وهي إن في طرف بيمارس بطش عسكري مقابل طرف سياسي وسلمي
أما إني اقول حل معين فده من رأيي مش صحيح لإننا المفروض نتناقش البدائل كلها
والموضوع بيطرح البدائل دي كمسارات للحل
مش مجرد عرض المشكلة وفقط

وشكرا على التعليق

-------------------
مستنية الفرج
منورة المدونة في اول تعليق ليكي
ومتشكر جدا على ثنائك
اما إنتخابات الشورى
فعدم النزول ده كانت وجهة نظر
وحيثياتها اللي ذكرتية في كلامك
لكن في المقابل في وجهة نظر تانية بتقول لازم نخلي النظام ما يعرفش يزور بدون فضايح
يعني نخلي الحرامي معروف للناس كلها ما يبقاش حرامي وعامل نفسة شريف
اما موضوع ليه 19 فده لإن مبدأ الدخول كان على اساس فضح النظام بشكل اساسي

المهم

هو إننا دلوقت نناقش ما بعد الإنتخابات دي على اساس إننا مش هنعرف نضغط عن طريق العملية الإنتخابية السياسية
دلوقت بقى تحريك الجماهييير ناحية التمرد هو الإتجاه الصحيح

وشكرا على الزيارة وسعدت بتعليقك

محمد حمزة

واحد من الإخوان said...

المعلقة المجهولة رقم 2
اشكرك شكرا جزيلا على هذا الثناء
واتمنى ان اكون كما قلتي
-------------
اما الجانب الإجتماعي فهو احد المحاور التطبيقية للتغييير
وهي جانب طوييل الأمد
وفي هو لا يتعارض مع الطرح اللي مكتوب بل بالعكس بيتوافق معاه
لكن لم يتطرق الحديث ليه لإن الكلام عن التفكيير في طرق سياسية فعالة كوسيلة بديلة للعملية الإنتخابية في المجالس النيابية
وأحييكي على لفت الإنتباه لهذا الأمر وإن كان الجانب الإجتماعي سيؤدي بنا إلى نفس النتيجة للإنتخابات السياسية
ليه ؟؟
لإننا في النهاية عاوزين نترجم كل جهودنا لوسيلة ضغط حقيقية وفعالة تخلي نظام فاسد ليه في السلطة عشرات السنين يخضع ويتنازل ولو نسبيا

وشكرا على التعليق

---------------------------
الدكتور عمرو كمال
مرحب بيك معلقا
اما تعليقاتك على تعليقات القراء فدي متروكة ليهم هم يتناقشوا معاك فيها
انا هعلق على النقتطين الأخروين من كلامك
متفق معاك ان الإخوان هم الفصيل الأكبر في المعارضة
واختلف معك في أن توسيع التنظيم أفقيا سيؤدي إلى عمل ضغط شعبي
ليه ؟
لإننا في النهاية لو اصبح الإخوان 2 مليون مثلا
لازم يكون في فعل يمثل ضغط
وهو ده اللي بنتكلم عليه دلوقت
وهو التفكيير في فعل من شأنه إنه يعمل ضغط حقيقي على النظام
أما رفع الوعي عند الشعب
لو تسمحلي اعيد صياغتها
بتحريك الإيجابية وروح المشاركة والجرأة عند الناس
أما السؤال اللي انا طرحتة
فده ما ينفعش يجاوب عليه شخص واحد
ده لازم كلنا نفكر في كل الوسائل التطبيقية للفكرة عشان نخرج بأفكار قابلة للتحقيق
وعلى كل حال
انا لما طرحت السؤال كانت الإجابة موجودة ضمنيا
عن طريق تحريك الناس عن طريق الحالة الإقتصادية اللي بيعيشوها خاصة لما إتكلمت عن حزام العشوائيات وغيرة
ده إلى جانب العمال والمهنييين بشكل خاص

وشكرا على تعليقك الثري

محمد حمزة

واحد من الإخوان said...

الأخ محمود سعيد
شكرا على المشاكة الفعالة
أولا
السياسة مش إنتخابات وبس
لأ
العصيان المدني والتحركات الشعبية دي هي اساس السياسة
والإنتخابات جاءت كعملية منظمة لإرادة الشعوب بعد العديد من الثورات
ما حدش قال نسيب السياسة طبعا ده كلام مش صحيح
لكن
نغير شكل الممارسة السياسية
من شكل اقل فاعلية الأن إلى شكل اخر اكثر ضغطا وفاعلية نحقق بيه تقدم ونخلي الطرف التاني يتنازل شوية
أما التربية
فهي شيئ عظيم جدا
لكن انا وإنت وغيرنا وغيرنا بعد ما هيتربى على الإيجابية وهيصبح إيجابي
مش هنكون ساعتها محتاجين لعمل منظم كلنا نتحرك فيه مع بعض ؟؟؟؟
العمل المنظم ده هو اللي الكلام عنه
اللي يحول السلوك الإيجابي بتاعنا لحاجة تطبيقية فعالة

وشكرا على المشاركة

----------------------
المعلقة المجهولة رقم 2 مكرر
هو بداية واضح إنك حكمتي على كلام الدكتور عمرو بإنه كان هجوم عليكي لذلك كان ردك هجوم علية
في الحقيقة الموضوع بسيط وعادي لو إختلفنا المهم ما نعتبرش الهجوم ده بينتقص من حد فينا
وشكرا على التفاعل معانا


محمد حمزة

واحد من الإخوان said...

المعلقةالمجهولة رقم 3

لقد اتيتي بالخلاصة
فعلا
الناس ليها إحتياجات اساسية
يبقى لازم نوجه جهودنا ناحية الحاجات دي
لكن
هنوجه مجهودنا ناحية تحريك الناس للدفاع عن انفسهم في الحصول على الحاجات الأساسية من سكن وماكل وغيرة
مش هنروح إحنا نطلبهالهم !!!!1

وهي دي النقطة اللي كنت اتمنى إنك تلفتي النظر ليها
وشكرا جزيلا على المشاركة بشكل فيه تركيز عالي
واتمنى لو نعرف في المرة اللي جاية طبيعة تخصصك

---------------------------
الدكتور عمرو كمال
انا مش هرد على ردك على التعليق بتاع المجهولة رقم 2 اللي هو اصلا تعليق على تعليقك
هههههههههه
انا بس هقول إني سعيد بالمشاركات دي اللي كلها تفاعل إن شاء الله بناء
اما السؤال
فأنا جاوبت عليه في الرد الأول

وشكرا على إهتمامك

محمد حمزة

واحد من الإخوان said...

الأخ الكريم الأستاذ احمد عبد الجواد
لكم تسعدنا زيارتكم وتعليقكم

الخيار الثاني هو ما اميل إليه ايضا غير اني احب الدمج بينه وبين الخيار الرابع
على اساس
أن العصيان المدني نحركة عن طريق الحاجات الإقتصادية الأساسية لرجل الشارع العادي من وظيفة وسكن وراتب يكفيه ومياه يشربها
وفي هذا الدمج
سنتجنب ان تخرج تظاهرات الجوع العشوائية لإنها ستجد في هذا الدمج القائد في فاعليات العصيان المدني
واتمنى ان تكون فكرتي قد وصلت

وجزاكم الله خيرا على رأيك في التحليل
--------------------
الأخ الكريم محمد
فضفضة

ههههههههههه
والله يا اخي احمد مطر ده ما لوش حل
لكن انا بس مختلف معاه في البيت الأخير
ما ينفعش يلقي عليهم ويجري ؟؟؟
شكرا جزيلا على المشاركة يا اخ محمد


محمد حمزة

واحد من الإخوان said...

المهندس شاهنشي
صاحب المدونة الواعدة فوضى منظمة
ومرحب بيك في اول تعليق على المدونة

إحنا محتاجين فعلا ذراع إعلامي وده من اهم إحتياجاتنا حاليا
وكمان محتاجين نكسب ثقة النخب سواء ثقافية او مؤسسات مجتمع مدني
وده كله هيكون فاعليته عالية لو قدرنا نحرك رجل الشارع اللي ما بشاركش في اي حاجة

وشكرا على الزيارة والتعليق
----------------

الدكتور أحمد الجعلي

منور المدونة
انا عاوز ابدأمن الأخر
فعلا كل الحسابات دي ممكن تتغير في لحظة لو تغيرت معطيات المعادلة السياسية
والمطلوب هو التحرك سريعا في إطار المعطيات الحالية
وإيه المانع إننا لاإحنا اللي نوجد المعطيات الجديدة اللي تغير شكل العملية السياسية في مصر ؟؟؟؟
أما التوسع الرأسي فده ضروري جدا زي
واتفق معاك فيه انا والمهندس شاهين
لكن القاعدة الشعبية هي العنصر الذي سيخضع له النظام وبسرعة لو إستطعنا تحرييكة
العمال المهنيين الفلاحين الفقراء هؤاء لن نحصل على حركتهم القوية لو توسعنا رأسيا وفقط

وشكرا جزيلا على التعليق العميق كعادة افكارك عميقة

----------------------
الدكتور عمرو

هي واضحة من ساعة التعديلات الدستورية وانا معاك في فكرة ورشة عمل على كل المستويات للتفكيير في البدائل

واخييرا
مبروك على بداية المدونة الجديدة

وهندن في مالطة معاك إن شاء الله
بس يارب الصوت يوصل المرة دي


-------------------

وللجميع مني التحيه على المشاركة

ومن الملاحظ وجود ثلاث مجهولات في التعليق نتمنى لو يشاركن بأسمائهن حتى يكسرن حاجز المشاركة النسائية من وراء الستار

----------------------
وجزاكم الله خيرا

محمد حمزة

عمر عاشق القرآن said...

انا شخصيا اعتقد انها لم تعد تنفع

رايى بقى هو خيار التحرك الشعبى .. سيبك من القوى السياسية .. انت تمد ايديك للاصلاح واللى ييجى ييجى مش هنجرى ورا حد

الصح هو التوجه للشعب انا بجد بستغرب كيف الاخوان لا يملكون وسيلة اعلام واحدة موجهة للشعب المصرى
لا اذاعة ولا قناة !!!!

Dr cool بادّن في مالطا said...

السلام عليكم يا بشمهندس

في حاجتين عايز أقولهم

الحاجة الأولى ، و هي توضيح نقطة توسيع التنظيم

و لا أجد اختلافاً بين وجهة نظري و وجهة نظرك

فالهدف من توسيع التنظيم ، هو زيادة قدرة التنظيم على عمل فعل يمثل ضغط ، سواء قام بهذا الفعل التنظيم وحده ، أو استطاع أن يحرك الشارع معه ، و بالطبع فإن تحريك الشارع مع التنظيم سيكون أفضل كثيراً و لكن ليس مضموناً بالدرجة الكافية للأسف

قد ينجح الأمر بآلية ما أو تخطيط و تنظيم ما




النقطة الثانية ، و هي إن التعايقات خلصت تقريباً و لم نتوصل بعد إلى آليات لتحريك الشارع ، لعلنا ذكرنا الأوتار التي من الممكن أن نضرب عليها و لكن لم نذكر آليات ، إنت إيه رأيك ، عندك آليات محددة نتناقش فيها و للا الحال من بعضه و هتدخل معانا مغارة التفكير في آليات

Anonymous said...

والله أنا حاسه ان الكلام لسه ماخلصش فا ياريت لو ان الموضوع لا يغلق عشان فيه حاجات كتيرة لم تحسم بعد مع التوفيق للجميع

صيد الخاطر said...

حقيقة أخي الحبيب عجبني تحليلك للأمور
ولعله صادف كثير مما كان في نفسي
وأظن ان الحل
يمكمن
في : إعادةتحريك وتنشيط العمال في اضراباته وتهديف هذا الاضرابات من أجل الوطم مش عشان 5 جنيه ...
وأيضا في الوقت ذاته
تحريك الظلاب وزرع فكر الاضراب
ومعلوم أن الجاناح الطلابي الاخواني قوي جدا وهو أحد أسلح الجماعة وورقها الرباحة ضد النظام
تحرييك أساتذة الجامعة
والمعلمين عن طريق احياء ثاراتهم مع الحكومة
وأيضا زرع التغيير والايجابية في نفوس كان العشوائيات
يتحرك في هذا الاطار السابق كل الحركات المعارضة من اخوان وفد تجمع وغيرهم ...كل بقدره

بهذا وغيره وعلى مدى ليس بطويل
تخرج لدينا حركة منظمة واعية
تهدف لمصلحة الوطن
نحو عصيان مدني شامل
بهذا نستطيع الوصول للبديل الاخير والوحيد - تفاديا لكل المضار المترتبة على البدائل الاخرى -
وهو أنتفاوض الحكومة الشعب وهي مضطرة
أرجو الله تعالى أن يحمي مصر وشعب مصر

يا مراكبي said...

عجبني جدا طرح الموضوع وعجبتني كمان التعليقات .. الإتنين فيهم تشغيل دماغ جامد .. ماشاء الله

الجزء اللي يهمني أنا هو الجزء الخاص بالأربع خيارات اللي بينتظروا الوطن

الملفت للنظر إن الأربع خيارات فيهم خسائر كبيرة للأسف وما فيش فيهم خيار ممكن تفضله عن الباقيين اللهم إلا إذا الشعب صحي وثار ونجح بدون خسائر (ده كان الخيار التاني على فكرة) وده مستبعد

إذا لازم نستنتج إن الإصلاح لازم يصاحبه خسائر وتضحيات وما فيش حاجة هتيجي ببلاش

ياترى بقى إحنا اللي هنختار واحد من الأربعة وألا هنستنى لحد ما واحد فيهم يحصل بدون إختيار مننا؟

واحد من الإخوان said...

الأخ عمر ( مشروع بطل )1
هو فعلا زي ما كلنا متفقين لازم تحرك شعبي
يعني لازم نوجه جهودنا دلوقت لتحرييك الشارع وكمان قيادة التحرك ده
اما باقي القوى فلازم تكون معانا و إلا هيكون بقيادة فصيل واحد وهو الإخوان ومهما كان الفصيل كبيير لكن ما ينفعش يقود لوحدة ده لو بنتكلم عن قوى حقيقية
أما لو بنتكلم عن القوى الرسمية الموجودة في الأحزاب فدي ما فيش داعي للكلام عنها اساسا
والجانب الإعلامي صحيح محتاج فلوس لكن بقى ضرورة دلوقت لازم نوجدها

وشكرا جزيلا على المشاركة

----------------------
الدكتور همرو
فاعلية التحرك مهما توسعت افقيا فلن تتوسع لتحتوي الشعب داخل التنظيم !!11
المهم حو ان تتحول حركة الجماعة لحركة فاعلة
واحيانا التوسع الأفقي الزائد بيثقل الحركة الجماعية
اما عن الأليات
فالحوار كما قلت سابقا هو نقاش لتحريك الذهن ناحية بدائل اخرى غير صندوق الإنتخابات
حتى البدائل المطروحة ممكن رفضها جميعا و إيجاد بدائل اخرى
اما الأليات فلها نقاش اخر إن شاء الله
وانا مثلك افكر و حتى لو عندي رأي معين ناحية الليات يبقى رأي فردي يحتاج لمناقشة عامة

وجزاكم الله خيرا على المشاركة التي اثرت النقاش

محمد حمزة

واحد من الإخوان said...

الأخت الكريمة المعلقة المجهولة
الموضوع لم يغلق
لقد تحدثنا وتناقشنا في البدائل كتوجه عام للتحرك
ولنا عودة
للحديث عن اليات عملية لتحقيق هذا التوجه
وشكرا على مشاركتك الفعالة
------------------
الأخ الكريم صيد الخاطر
جزاكم الله خيرا على رأيك في التحليل
ومنور المدونة في اول تعليق لك
فعلا انا اتفق معك في الأليات التي تحدثت عنها من تحريك الطلاب والمعلمين وكل الفئات التي يمكن ان تتحرك في شكل منظم
لكي نصل في النهاية
لعصيان مدني حقيقي
يوصلنا - كما تحدثت في تعليقك - لمرحلة نجعل النظام يخضع فيها ويقبل التفاوض
وبذلك
يمكننا الدمج بين البدائل المطروحة
وشكرا على الزيارة والتعليق

محمد حمزة

واحد من الإخوان said...

المهندس أحمد القاضي

مشرفنا ومنورنا
وكم اكون سعيدا بمشاركتك في التعليقات

و حضرتك إختصرت الموضوع في إنه لازم يكون في تضحيات
فعلا في تضحيات هتبذل
ما فيش حد بيدي حاجة ببلاش
خاصة لو كانت الحاجة دي هي السلطة اللي بيسيطر عليها
------
أما سؤالك الأخير
فأنا فهمت منه إنه رسالة فيها دعوة إلى إننا ما ننتظرش إن البدائل دي تتحقق لوحدها لازم نتحرك إحنا لتغيير المعادلة وعشان نخلي البدائل دي واقع بدل ما هي مجرد تفكيييييير

وشكرا جزيلا على المشاركة
وعلى الرسائل الضمنية الموجودة في تعليقك

محمد حمزة

قلب أبيــض said...

ندعوكم للمشاركة معنا فى
( الملتقى )
ملتقى امدونين
ملتقى الافكاروالاراء
فى مدونة واحدة تجمع افكارنا
تسعدنا مشاركاتكم معنا

mo'men mohamed said...

والله أخى انا من نظرى ان الإخوان لازم يهدوا اللعب شويه
احنا كل ما بنعاند الحكومه بتعاند
عشان كده لازم نهدى شويه على الأقل نستعيد الجهد الضائع
السلام عليكم

واحد من الإخوان said...

الأخ احمد سعيد قلب ابيض
إن شاء الله أكون من المشاركين الفاعلين
وشكرا على مرورك و إهتمامك

-------------
rodrigo,
plz ,
arabic or english language
thx

-----------
الأخ مؤمن محمد
هو بس اي تهدئه او اي حركة لابد تكون على اساس هدف واضح مش لمجرد الهروب
بمعنى
غننا لو هنهدي يبقى ده إستراتيجية إحنا حطينها مش مجرد رد فعل لضغط واقع علينا

وشكرا على زيارتك وتعليقك
ومنور المدونة في اول تعليق ليك

محمد حمزة